Cuentue kulucho ko kukuchi
Beꞌe naa nchaꞌon kulucho chjeꞌa na̱ ba ka juine ba ko anto beꞌen ba jintha.
Ko taxindangeꞌe ba ko kjui ba ngandangii thi jiaxiꞌin kukuchi ixin juine ba ka dixexin dine kukuchi.
Ko kukuchi ndachro ba:
―¿Unda jaꞌa anto ncheꞌe xra ko chjaꞌa na̱ jinthe jian ko jaꞌan ná xruꞌin xra nthaꞌa ná ko anto jian jine ná ko tsinda ná nanao?
Kuthimejan kulucho ndachro ba:
―Jaan ndua anto nthaꞌa xra ko te nchaꞌon xruꞌin jinda diꞌi, aro icha see sarichon jaꞌan ke jaꞌa ra.
Kuthimejan kukuchi banchiangi ba:
―¿Unda seꞌa sinthechon ná jaꞌan ná? ¿Kexreen nuaxin jaꞌa?
Ko nichja kulucho inaa ko ndachro ba:
―Jaan jaꞌan nuna, ixin jai juikian ná karaꞌo ruxruthexin ra jaꞌa ra, ixin ndue ndasuen ra na̱, jaꞌa,
kunthaxijno ko kuthuchjon ixin ndue tsutheꞌe naa xeꞌen nchaa ná.
Jañaa kuiꞌin kukuchi ko anto xraon ba.
Kuthimejan kukuchi ndache ba kunthaxijno ko kuthuchjon:
―¿Kexreen sinthoꞌo ná jai?, ixin ndue ndasuen ná na̱ ixin ndue tsutheꞌe xeꞌen nchaa ná.
Ixin kulucho kuama karaꞌo juiaꞌo na̱ ixin ruxruthexin ná ndue.
Kuthimejan kuthuchjon ko kunthaxijno binthendachro ba:
―Icha jian jai tsukjin satsinga ná.
Ko kukuchi ndachro:
―jaan icha jian jai satsinga ná, aro jaꞌan anto nthao na ko chroꞌa santhjaa thi jiaxina.
Ko kuthuchjon batheꞌe ko ndachro:
―Jaꞌan ná santhjaa ná thi jiaxiꞌan ko jaikua satsji ná.
Ko kukuchi batheꞌe ba:
―Jaan remee. Ko ndua nchion kunaxinxeꞌe are ujuii na̱ juitsjeꞌe na̱ ba ko ndachro na̱:
―Ndue suen ná kukuchi, kuthuchjon ko kunthaxijno.
Ko jeꞌe ba kuiꞌin ba yaa ko icha binthexraon ba.
Ko are inchin ngusine thi̱e bachrje kuthuchjon ko ndache ba kunthaxijno:
―Anchee danthjee ná thi jiaxiꞌin kukuchi ixin satsji ná kain ná.
Ndua bintheganthjee ba thi jiaxiꞌin kukuchi. Ko bachrje kukuchi ko sabinthekinga ba.
Ko are bingasaan ni ruguen ba bitsjeꞌe na̱ thi te ba, aro ikoꞌa ba.
Kuthimejan ni ruguen ba ndachro na̱ ngain ni icha:
―Aro keꞌe kuxiigo suꞌen na̱, ixin ixruꞌin kuxiigo jii.
Ko tuin juitsjeꞌe ni icha ko nduaxin, ixruꞌin kuxiigo beꞌe.
Kuthimejan ruee na̱ thi dingachje ruthee ba.
Aro jeꞌe ba sadikji ba ngagaꞌa jna ko ibitjaꞌa na̱ ba.
Kuthimejan sakjan na̱ nchianduꞌa na̱ ko ixruꞌin kiai binthechunda na̱.
Ko nthiꞌa ngagaꞌa jna jeꞌe ba anto binthexraon ba ixin bakuyao kundanixra,
mexinxin kjuauthexin choo ba.
Ko kuthuchjon ndachro ba ngain kunthaxijno:
―Jaꞌa ngagaꞌa nthaa darichrin ko are sikon tsii kundanixra tuyauthe ni ra suji.
Ko kunthaxijno ndachro ba:
―Jaan.
Ko ndua are bakii kundanixra, kunthaxijno bandachro:
―Gordo, gordo, gordo, gordo.
Ko kuthuchjon batjon ba ko bagintja ba nunthe kunixin raa ba.
Ko kukuchi suji bakujieꞌe ba.
Ko jañaa bakiꞌin kundanixra ko baxraon ba ko ibakunchienꞌa ba.
Jañaxon ko jañaxon bancheꞌe ba bithjaja yoo kunithjao.
Kuthimejan kunthaxijno ndachro ba:
―Anchee ji ná isuenꞌa ná na̱, icha jian sakjan ná ngain na̱ inaa.
Ndua batho yoo kunithjao, kuthimejan ngain naa thie̱ binthekjan ba nduꞌa ba.
Ko are ubingasaan unthiꞌa tate ba. Kuthimejan ni kuxigue bikon na̱ ba ko anto chee na̱.
Ko ndachro na̱:
―¡Dinthekjan kuxigua ná! Anchee irrundachroꞌa ná ixin suen ná ba.
Icha jian ncho nchetsjé choo ba kuthimejan sinthukji ná ba.
Ndua, jian basiꞌin na̱ ba juine ba ko tabinthe ba nchia.
Yaa juexinxin kuentue kukuchi ko kulucho.
